Sintèsi de las accions a còstes constants

La senhaletica bilingua permet a l’escolan de comprene que la lenga occitana demòra presenta en defòra de l’escòla : consultatz nòstras paginas dedicadas per mai de detalhs (aicí pels cursus bilingües e aicí per l’ensenhament afortit).

La mesa en plaça d’una tala senhaletica es de competéncia del Conselh Departamental dont conven donc de se raprochar.

Lo vòte en conselh comunautari e/o municipal d’una sistematizacion de la senhaletica bilingua comunala o intercomunala pendent una creacion o d’una refeccion de panèl permet de garantir la preséncia de la lenga occitana dins l’espaci public sens ocasionar de subrecòst puèi que las doas lengas seràn presentas sul meteis supòrt. Los luòcs d’aplicacion son variats (trajèctes toristics, caminòls d’escorregudas, vias urbanas, bastiments municipals e intercomunals, etc.) : l’OPLO vos acompanha sus aquel subjècte (consultatz la pagina dedicada sus nòstre sit).

La preséncia de l’occitan dins las anóncias d’espèra o de barradura dels respondedors telefonics de vòstra collectivitat constituís un element fòrt de la socializacion de la lenga (sa preséncia dins l’espaci public, qu’el siá visual o auditiu).

Lo sit internet, los bulletins comunals o intercomunals e totes los autres supòrts de comunicacion de vòstra collectivitat son tant de luòcs ont la lenga occitana a drech de ciutat. Vos es possible de tornar bilingüe gratuitament totes aqueles supòrts per tal d’agir per sa valorizacion : l’OPLO vos acompanha sus aquel subjècte (consultatz la pagina dedicada sus nòstre sit).

Las plaquetas toristicas son las veirinas de vòstre territòri, dont la cultura occitana fa partida integranta, al près del mond exterior. La preséncia de la lenga occitana sus aquestas es donc un mejan d’assumir l’especificitat lingüistica de vòstre territòri.

Los Oficis de torisme son egalament d’interlocutors amb los quals podètz trabalhar per encoratjar la valorizacion de vòstre patrimòni lingüistic e cultural occitan dins lors accions. Son d’estructuras que pòdon beneficiar de formacions sul subjècte.

Lo CIRDÒC – Institut occitan de cultura vos acompanha sus aquel subjècte.

Los baptismes civils, los maridatges, los librets de PACS, l’acuèlhs de novèls arribants o per exemple las nòças de diamant : vòstra collectivitat a la possibilitat d’emplegar la lenga occitana pendent aqueles eveniments.

L’OPLO vos acompanha sus aquel subjècte (contactatz-nos per nòstra seccion contacte).