Dins l'encastre de l'acompanhament de las collectivitats volontàrias, l'OPLO prepara diferents espleches destinats a sostenir las iniciativas ligadas a la valorizacion de la lenga occitana dins l'espaci public.
La senhaletica bilingua, qu'ès aquò ?
Desplegar una senhaletica bilingua consistís a utilizar l’occitan, al costat del francés, dins l’espaci public per la senhaletica e la comunicacion de la collectivitat.
Aquò pòt concernir de panèls de senhalizacion rotièra (direccions, dintradas de comuna, limitacions…), los trajèctes toristics (luòcs d’interèsses, escorregudas…), las placas de carrièras, la senhaletica associada als bastiments (intèrn e extèrn), la comunicacion institucionala (bulletins municipals, panèls d’afichatge, sit web, anóncias sonòras, logos e entèstas de documents, libret d’acuèlh dels arribants novèls…) o tot acte oficial (maridatges, baptismes civils, naissenças, decèsses, deliberacions, convocacions…).
Acompanhar las comunas e las intercomunalitats
Lo desplegament d’una senhaletica bilingua francés-occitan a l’escala d’una collectivitat es una oportunitat per :
- Respondre a una demanda d’una larja majoritat de la populacion de far venir la lenga occitana presenta e visibla dins l’espaci public ;
- Afortir l’atractivitat del territòri, en ligam amb son desvolopament toristic e economic, en valorizant son istòria, sa cultura e sa lenga ;
- Téisser de ligam entre las generacions, entre locutors, apprenants e non locutors ;
- Completar los beneficis de l’ensenhament de l’occitan a l’escòla en permetent a la lenga d’èsser presenta en defòra del quadre escolar e atal encoratjar sa practica.
Es per acompanhar las comunas e intercomunalitats volontàrias que l’OPLO ven de publicar una ficha dedicada. Aquela ficha serà integrada dins un « kit collectivitats » difusat e mes a la disposicion dels actors tre lo mes de setembre.
