Valorizar lo patrimòni cultural local
Elegit/idas, technician.a.s d'una collectivitat, desiratz valorizar vòstre patrimòni occitan ? L'OPLO vos acompanha !
Qu’es aquò ?
Lo patrimòni cultural es un atot per las collectivitats que fan la causida de n’assegurar la preservacion e la valorizacion : esplech de coesion sociala per la transmission d’una cultura comuna, es tanben un motor economic fòrt.
Collèctas o inventaris, exposicions, conferéncias, creacions artisticas… son tant d’accions permetent de valorizar la diversitat del patrimòni occitan tant dins sa dimension materiala (patrimòni escrich, monuments, objèctes d’art…) qu’immateriala (rituals, saber-far, tradicion orala…) e d’o transmetre al public grand.
Perqué ?
- Permetre l’accès de totes los publics a las òbras, als documents e a las informacions que los interèssan ;
- Promòure la diversitat de las expressions culturalas dins la societat actuala ;
- Permetre als occitanofòns, locutors/tritz o aprenent.a.s d’aver de practicas culturalas en occitan ;
- Capitalizar sus la valor economica d’aquel patrimone singular, dins una logica de desvolopament toristic e d’atractivitat del territòri ;
- Respondre a una espèra de la populacion : 70% de la populacion de las regions Novèla Aquitània e Occitània desiran desvolopar las practicas bilinguas dins los luòcs publics, segon l’enquèsta sociolingüistica sus las practicas e representacions de la lenga occitana publicada en 2020 per l’Ofici public de la lenga occitana.
Cossí ?
Lo CIRDÒC – Institut occitan de cultura, fòrt de sos dos labèls (Etnopòl e Collex), acompanha las collectivitats, lors establiments e lors agents (professionnal.a.s de la cultura, del torisme, de l’educacion…) dins lor projècte de valorizacion del patrimòni occitan. Desvolopa sustot un ensemble de supòrts e d’espleches e met a disposicion sas competéncias en matèria d’engenhariá culturala :
- ETAPA 1 – Estat dels luòcs de las colleccions e practicas culturalas (istòria, patrimòni, documentacion, fonzes literaris e patrimonials, patrimònis vius…) aital coma de ressorsas umanas e materialas (actors culturals, finançaments…) del territòri ;
- ETAPA 2 – Acompanhament de projècte : ajuda a la concepcion e a la començada, formacion dels actors, identificacion de las fonts de finançament disponibles, ajuda a la comunicacion ;
- ETAPA 3 – Mesa a disposicion de ressorsas e de supòrts (exposicions itinerantas, seleccions tematicas, prèstes d’òbras e de ressorsas), se s’escai, coproduccions d’espleches e d’accions (événementielles, educativas, patrimonialas…) especifics al territòri concernit.
Per vos ajudar
Servici d’informacion, expertesa documentària, acompanhament de projèctes, accions de formacion, prèst d’exposicions, prèst de salas e de supòrts de mediacion :
- Centre internacional de recèrca e de documentacion occitanas (CIRDÒC – Institut cultural de cultura)
www.oc-cultura.eu / secretariat@oc-cultura.eu
Desvolopament de l’ofèrta d’ensenhament, mesa en relacion amb los operators de terren, espleches de promocion e de valorizacion, ressorsas a destinacion dels elegit/ida.s e dels agents de las collectivitats :
- Ofici public de la lenga occitana (OPLO)
www.ofici-occitan.eu / contact@ofici-occitan.eu
Una question ? Contactatz l'OPLO !
Ne saber + suls projèctes relatius a la lenga occitana :
Office public de la langue occitane
22 boulevard du Maréchal Juin
31406 Toulouse cedex 9
05 31 61 80 50
contact@ofici-occitan.eu
