Volètz ensenhar l’occitan

Los dispositius "ENSENHAR"

Dispositius ENSENHAR Professor e Estudiant : l’Ofici public de la lenga occitana prepausa dos dispositius de cap als-a las estudiant-a-s, dins las regions Novèla-Aquitania e Occitània, e dels-de las professor-a-s (acadèmia de Bordèu sonque) que desiran ensenhar l’occitan o en occitan.

Accion ensenhament superior

L’Ofici òbra en favor de l’aprentissatge de l’occitan dens las formacions de l’ensenhament superior, per fin de formar potenciaus futurs ensenhaire-a-s occitanofòne-a-s.

D’un montant de 8 000 € sus dos ans, la borsa Ensenhar es una ajuda individuala adressada als estudiants que se destinan a ensenhar en occitan alprèp dels enfants de 3 a 11 ans dins las escòlas e filièras bilinguas francés-occitan de las acadèmias de Bordèu, Limòtges, Montpelhièr, Peitius o Tolosa (regions Novèla-Aquitània e Occitània).

Aquel borsa s’adreça als estudiants que son inscrits en tresena annada de licéncia o en primièra annada de Master e que son motivats per l’ensenhament en occitan e s’engatjan dins los percors de formacion bilingua.

Sostenguda per l’Estat e las collectivitats territorialas, la transmission de la lenga occitana via l’escòla, qu’es un actor essencial d’aquela transmission, se desvolòpa. Uèi, gareben 10 000 escolans benefician d’un ensenhament bilingue francés / occitan dins las escòlas mairalas o elementàrias de las regions Novèla-Aquitània e Occitània. Es dos còps e mièg mai qu’en 2008. Aquelas filièras se desvolopan tanben al collègi e al licèu.

Lo dispausitiu de las borsas ensenhar a per objectiu de sostenir las vocacions als concorses de recrutament dels professors de las escòlas bilinguas, dins lo quadre d’un partenariat entre las Regions Novèla-Aquitània e Occitània, lo Ministèri de l’Educacion nacionala e l’Ofici public de la lenga occitana. S’agís en efièit de respondre a la demanda creissenta d’obertura de novèls sites bilngues dins nòstras acadèmias.

Primièra session 2020-2021 : depaus de las candidaturas abans lo 15 de junh 2020

Segonda session 2020-2021 : depaus de las candidaturas abans lo 15 d’octobre 2020.

La nòstra brocadura d’informacion : Telecargar

Reglament e letra d’engatjament : Telecargar

La manca de ressorça umana en tèrmes d’ensenhaires occitanofònes damòra un subjècte chepicós per los partenaris publics de la politica linguistica. Aquò constituís dempui mantunas annadas jà un travadèir per la mèsa en òbra de las orientacions ministerialas e la dubertura deus hialats bilingues francés-occitan dens l’academia de Bordèu. Atau, l’ex-Region Aquitània e lo rectorat de Bordèu decidín en 2014 d’espandir lo dispositiu ENSENHAR aus ensenhaires monolingues desirós de se formar a l’occitan per devenir ensenhaire bilingue.

Lo pilotatge deu dispositiu es uèi hidat a l’Ofici public de la lenga occitana, en collaboracion estreita damb los servicis de l’Educacion nacionau, autanplan au nivèu rectorau com au nivèu departamentau.

Lo dispositiu « ENSENHAR – Professor » consistís en la prèsa en carga per l’Ofici public de la lenga occitana d’una formacion en favor deus – de las ensenhaire-a-s deu 1èir grad e deu 2nd grad titulàri-a-s de l’Educacion nacionau desirós-a-s de se formar a l’occitan per fin d’ensenhar dens aquera lenga. Es mèsa en plaça dens l’encastre d’una experimentacion menada conjuntament per l’Ofici public de la lenga occitana e lo rectorat de l’academia de Bordèu.

Quau objectiu ?

Formar pro de personas que sian en capacitat d’ensenhar la lenga occitana ou en lenga occitana dens lo malhum escolar per ne’n perméter sa transmission.

Pour quau ?

Lo dispositiu concernís tots los perfius, tots los ensenhaires titularis deu 1èir grad pòden atau preténer ensenhar la lenga occitana e los de n’impòrta quina disciplina dens lo 2nd grad pòden èster abilitats en occitan, en foncion totun deus besonhs reperats per los servicis de l’Educacion nacionau sus l’academia de Bordèu. Las condicions d’accès son las seguentas :

èster en pòste au dentre de l’Educacion nacionau (1èir et 2nd grad) dens l’academia de Bordèu

O

  èster en disponibilitat (non-remunerats per l’Educacion nacionau) ;

O

  beneficiar d’un congècte formacion hòra academia de Bordèu.

Sonque los contractuaus e los estagiaris ne’n seràn estremats.

En contrapartida de la prèsa en carga d’aquera formacion, los beneficiaris s’engatjan :

  a seguir la totalitat de la formacion ;

  a s’inscríver e a se presentar a las espròvas d’abilitacion o de certificacion complementària a l’ensenhament de l’occitan (en fin de formacion) ;

  a ensenhar en occitan pendent 5 ans au mens en Novèla-Aquitània après la lor abilitacion ;

a passar lo Diplòme de competéncia en lenga (DCL) occitan en fin de formacion e a ne’n comunicar la resulta aus servicis de l’Ofici public de la lenga occitana ;

  a demandar sa mutacion pendent 3 ans minimum dens las academias de Bordèu o de Lemòtges per los – las professor-a-s restacat-da-s a una auta academia.

Cas particular per lo 2nd grad :

  Purmèir cas, los ensenhaires que desiran ensenhar la lenga, dens lo 2nd grad, non càmbian pas de pòste pendent lo processús. Au cap deu processús, lo-la professor-a ensenharà una partida deu son servici dens la disciplina « occitan » e las òras mei dens sa disciplina.

  Segond cas, los-las ensenhaire-a-s que desiran ensenhar una DNL en occitan dens lo 2nd grad o dens un siti bilingue francés – occitan dens lo 1èir grad, per los quaus un calendàri de securisacion es prepausat (veire mei bas). Lo dispositiu s’apuja sus lo principi de creacions de pòstes especifics a perfiu, çò qu’a l’avantatge de hèser correspondre au besonh reau d’un establiment identificat deus ensenhaires candidats motivats recrutats segon una procedura lisibla e transparenta (dubertura annuau d’un apèl a candidatura).

Nautat 2020 espandiment de las condicions d’accès aus ensenhaires que benefician d’un congècte formacion hòra academia de Bordèu o en disponibilitat !

Una extension a las academias de Lemòtges, Montpelhièr, Peitius e Tolosa es tanben prevista en partenariat damb los diferents rectorats dens lo quadre de las convencions academicas jà signadas o en cors de finalisacion.

 

Modalitats de formacion

Per los ensenhaires titularis de l’academia de Bordèu, la formacion s’inscriu dens lo quadre deu Plan de Formacion Continua deu rectorat. Que que sia l’estatut de l’ensenhaire(a) beneficiari(a) totun, la formacion compren 468h de cors compartits sus 26 setmanas, atau com estagis en classa e au dentre deu Cap’Òc-Canopé pendent 7 setmanas.

Lo (la) professor-a beneficia d’una descarga de cors a temps plen pendent lo, sus la totalitat d’una annada escolara.

Un o mantuns luòc-s de formacions son prepausats cada annada dens l’academia de Bordèu en foncion deu nombre e de l’origina deus candidat-a-s, aqueths (aqueras) déven formular una causida de luòc de formacion. Un luòc de formacion arcuelha un minimum de dus ensenhaire-a-s.

Còst de la formacion

La formacion es integraument finançada per l’Ofici public de la lenga occitana capvath l’autrei dirècte de credits a las estructuras de formacions dedicadas. Per sa part, lo rectorat de l’academia de Bordèu assegura un mantién totau deu salari de l’ensenhaire beneficiari pendent la totalitat de la durada de la formacion.Calendari 2020-2021 :

Etapa 1 : seleccion deus candidats

  Deu 14 de genèir au 13 de març de 2020 12h, dubertura de las candidaturas e recepcion deus dossièrs.

  Dimècres 15 d’abriu de 2020, rescontra deus candidats e seleccion per la jurada de las personas que seràn formadas sus cada pòste.

 

Etapa 2 : Formacion e abilitacion deus candidats

  De seteme de 2020 dinc a junh de 2021, debuta de la formacion a temps plen (luòc de definir en foncion de las localisacions deus candidats) e remplaçament en parallèle sus lo lor pòste.

  En mai de 2021, passatge deu DCL e obtencion deu nivèu B2 esperada.

  En juin de 2021, atestacion desliurada per una abilitacion a ensenhar una DNL o la lenga occitan, e la persona damòra sus lo pòste.

  En seteme de 2021 (dentrada escolara), l’ensenhaire es en pòste au dentre d’un cursus bilingue (1èir grad) o dens un collègi o un licèu (occitan en DNL o en opcion).

Coma bastir son dossièr ?

Lo dossièr deverà èster adreiçat aus servicis deu rectorat a l’adreiça seguenta : ce.drh@nullac-bordeaux.fr copia contact@nullofici-occitan.eu (Ofici public de la lenga occitana) – L’objècte deverà precisar : ” Candidatura dispositiu « ENSENHAR – Professeur “

Comprenerà :

  un CV a jorn

  una letra de motivacion presentan lo projècte professionau, en tot precisar lo tipe d’ensenhament au quau lo (la) candidat-a se destina o es en pòste, atau com lo perimètre geografic desirat ;

  la letra d’engatjament emplenada e plan signada (engatjament a ensenhar au mens 5 ans en occitan dens l’académie de Bordèu ;

  una copia deu darrèir decret de nominacion dens lo còs deus- de las – ensenhaire-a-s ;

  l’arrestat de congècte formacion per los-las aute-a-s candidat-a-s (hòra academia de Bordèu).

Procedura de seleccion de las candidat-a-s

Las candidat-a-s qu’auràn manifestat la lor volontat de s’engatjar dens aqueth dispositiu de formacion seràn seleccionat-ada-s per una jurada compausat de representants de l’Educacion nacionau e de l’Ofici public de la lenga occitana.

Sonque los dossièrs complets seràn tractats per los servicis deu rectorat de l’academia de Bordèu.

Uelhàtz lo reportatge d’ÒCtele sul dispositiu ENSENHAR Professor

Opcion occitan a l’INSPE de l’academia de Bordèu per vàder professor de las escòlas en occitan.

L’Ofici public de la lenga occitana acompanhèt la creacion d’un cursus de formacion a la lenga occitana per los-las estudiant-a-s de l’INSPE de l’academia de Bordèu que desiran hèser grasilhar las loras competéncias linguisticas dens la mira de vàder professor de las escòlas en occitan.

L’INSPE (Institut nacionau superior deu professorat e de l’educacion) assegura la formacion deus/de las estudiant-a-s que se viran de cap aus mestèirs de professor de las escòlas e qu’aprestan lo CRPE (concors de recrutament de professor de las escòlas) vià lo master MEEF – Mestèirs de l’ensenhament, de l’educacion e de la formacion, mencion « Purmèir grad ».

Per fin de veire grasilhar la ressorça ensenhaira occitanofòna, dempui 2018, jos l’impulcion e damb l’ajuda de l’Ofici, l’INSPE de l’academia de Bordèu a dubert un cursús de preparacion deu concors bilingue occitan de las escòlas (CRPE especiau occitan). L’objectiu es de perméter aus/a las estudiant-a-s que se desiran presentar a n’aqueth concors d’aquesir capvath la lora formacion las competéncias linguisticas necessàrias.

Augmentar la ressorça ensenhaira occitanofòna es un enjòc màger per perméter la transmission de la lenga vià l’escòla, que constituís una de las missions principalas de l’Ofici. Òbra donc a espandir a tèrmi aqueth dispositiu dens d’autas academias de las regions Novèla-Aquitània e Occitania.


 

Cursús de preparacion deu concors bilingue occitan de las escòlas (CRPE especiau occitan) a l’INSPE de l’academia de Bordèu :

 

Quinas modalitats de formacion a l’INSPE de l’academia de Bordèu ?

  Opcion occitan deu master MEEF – mencion «Purmèir grad»

La maqueta pedagogica de l’opcion occitan deu master MEEF – mencion «Purmèir grad» (nivèu M1) prepausa 24 h de cors d’occitan per semestre :

  • 6 h de visiò-conferéncia ;
  • 3 sessions de 6h de cors en presenciau a Bordèu ;

sia un totau de 48h sus l’ensemble de l’annada.

En saber mei

  Module complementari d’occitan

Au-delà deus cors dispensats dens l’encastre de l’opcion occitan, l’Ofici finança un module de 50 h complementàrias per los-las estudiant-a-s que desiran beneficiar d’un ensenhament renforçat.

Atau, los-las estudiant-a-s pòden beneficiar d’un totau de près de 100 h de formacion a l’occitan pendent la purmèira annada de master.

On se formar ?

Aqueth cursús es estat concebut per èster accessible sus los 6 sitis de l’INSPE

 Agen (47),

 Bordèu-Cauderan e Merinhac (33),

 Lo Mont-de-Marsan (40),

 Pau (64),

 Peirigús (24).

cf mapa (source : INSPE – 2019 ©)

Per quau ?

Per fin d’aprestar au melhor lo CRPE especiau occitan, en seguida de la lora admission au master MEEF – mencion « Purmèir grad », tots los-las estudiant-a-s de l’academia de Bordèu an la possibilitat de sollicitar directament auprès de l’INSPE la lora participacion a n’aqueth cursús, shens nada condicion de nivèu especific en lenga.

E lo cursús es eligible au dispositiu ENSENHAR Estudiant ?

Los-las estudiant-a-s deu master MEEF – mencion « Purmèir grad » de l’INSPE de l’academia de Bordèu son adara eligible-a-s au dispositiu ENSENHAR Estudiant portat per l’Ofici que prepausa borsas d’estudis.

Informacions e condicions : rubrica ENSENHAR Estudiant.

Per totas demandas complementàrias, esitetz pas a nos contactar via nòstra pagina “nos contactar”.

Ofici public de la lengua occitana

22, bd maréchal juin
31406 Tolosa cedex 9

Tel 05 82 60 02 80

Scroll to Top