Una novèla circulara sus las lengas regionalas precisa l’immersion dins l’ensenhament privat e tanben public
Lo Ministèri de l’Educacion nacionala publiquèt, lo 16 de decembre passat, la novèla circulara sus las lengas regionalas, qu’explica lo novèl quadre legal que s’aplica en seguida de l’adoption de la lei dita “Molac” del 21 de mai de 2021. En amont de la publicacion de la circulara, cal precisar que los Oficis publics de las lengas foguèron consultats pel ministèri e faguèron de proposicions sul tèxte. Es lo primièr còp qu’un dialògue es atal installat en amont de la publicacion d’un tal tèxte. Unas de las preconizacions dels Oficis foguèron presas en compte.
Per çò que concernís las novetats rapòrt a la circulara de 2017, podèm mençonar los punts que seguisson :
1. L’ensenhament immersiu dintra a l’escòla publica
Lo tèxte ministerial precisa las condicions dins las qualas se pòt organizar l’ensenhament dit “immersiu” qu’èra praticat fins ara quasi sonque dins las escòlas associativas (Calandreta, Seaska, Bressola, Diwan) : d’ara enlà, çò precisa la circulara, se pòt practicar tanben dins los establiments publics de la mairala al licèu. Concretament, aquò vòl dire, qu’en acòrdi amb lo projècte d’escòla, los regents de las escòlas publicas poiràn far mai de la mitat de sos corses en occitan. Fins ara, dins las escòlas occitanas en tot cas, un plafond èra fixat : caliá pas despassar 50 % del temps de classa en occitan.
2. Una ofèrta d’ensenhament de l’occitan a totes los escolans, collegians e liceans volontaris
La circulara rapèla dins son preambule que la lei “Molac” dispausa que “la lenga regionala es una matèria ensenhada dins lo quadre de l’orari normal de las escòlas mairalas e elementàrias, dels collègis e licèus, dins l’objectiu de prepausar l’ensenhament de la lenga regionala a totes los escolans”. La lei indica qu’aquela dispausicion se deu concretizar dins lo quadre de convencions que seràn signadas ambe las Regions. Es una de las avançadas màgers de la lei qu’es atal rapelada per la circulara.
3. Un melhor finançament de las escòlas associativas bilinguas occitanas
Las comunas de residéncias dels parents qu’an escolarizat sos dròlles dins una escòla bilingua associativa occitana d’una autra comuna deuràn participar a finançar aquela escòla se dispausan pas ja d’un ensenhament bilingüe occitan sus lor territòri.
4. Doas novèlas lengas regionalas reconegudas pel ministèri
Cal apondre que doas lengas regionalas son d’ara enlà reconegudas pel ministèri de l’educacion nacionala : lo quibuchi e lo chimaore (lengas de Maiòta).
5. Integracion de las lengas regionalas al plan lengas del Ministèri
Sonque dedicat a las lengas estrangièras e a l’anglés mai que mai fins ara, las lengas regionalas son ara integradas al plan lengas del ministèri, que prevei un desvolopament dels ensenhaments de las lengas dins las disciplinas ditas non lingüísticas (matematicas, istòria-geografia)….
6. Creacion d’un Conselh superior de las lengas dont un collègi serà dedicat a las lengas regionalas
Aquel conselh, que ven d’èsser creat formalament, es una instància de reflexion, de consultacion e d’impulsion per l’ensenhament de las lengas vivas estrangièras o regionalas e las lengas ancianas. Lo collègi sus las lengas regionalas serà mobilizat çò indica la circulara sus de reflexions didacticas e pedagogicas. Serà presidit aquel collègi per la Rectritz de la Region academica Novèla-Aquitània : Mma BISAGNI-FAURE.
