E vosautres, quin diplòma d’occitan preparatz ?

Dins l'encastre de son « Plan d'accion licèu » per la lenga occitana, l'Ofici public de la lenga occitana acaba d'editar un desplegant que l’objectiu es de promòure las filièras d'estudis de l'occitan dins l'ensenhament superior. Aquel document serà difusat près dels liceans de las regions Novèla-Aquitània e Occitània e dels estudiants dels diferents establiments d'ensenhament superior que prepausan de formacions en ligam amb la lenga e la cultura occitanas.

Sièis bonas rasons de far sos estudis en occitan

L’occitan dins lo superior, son de percorses diplomants / certificants despartits sus tot lo territòri, de la L1 al Doctorat, accessibles en formacion iniciala, contunha o autanplan sens lo bac.

Causir de far sos estudis en occitan, es accedir a una paleta de disciplinas (cultura, istòria, literatura, sociolingüistica, gestion de politicas publicas, didactica, torisme…) amb una continuitat dels percorses garantida. 

Causir de far sos estudis en occitan, es se preparar a de mestièrs que recrutan : la comunicacion, l’ensenhament e la formacion, l’animacion e l’accion sociala, la traduccion e la documentacion, la cultura, la creacion e lo libre…

Causir de far sos estudis en occitan, es aver la possibilitat d’efectuar un o mantes semèstres a l’estrangièr (amb Catalonha, los Balears o Itàlia per exemple) e se familiarizar als mecanismes d’intercompreneson per èsser mai a la comoditat per parlar d’autras lengas.

Causir de far sos estudis en occitan, es se jónher a de rets dinamicas suls campus, dins las associacions o sus las rets socialas e beneficiar de ligams solids amb la comunitat de locutors. 

Causir de far sos estudis en occitan, es beneficiar d’un acompanhament personalizat per de professionals tot lo long de son cursus universitari.

Causir de far sos estudis en occitan, es enfin inscriure son percors de vida al còr d’un territòri e de son imaginàri.

Es l’ensem d’aqueles messatges qu’aparten a l’OPLO e a sos sòcis de far virar al prèp de las joves generacions per suscitar las vocacions. 

Un document elaborat amb l'ensems dels actors

Aquel document es estat elaborat amb l’ensems dels establiments d’ensenhament superior, publics e privats, que prepausan de formacions en ligam amb la lenga e la cultura occitanas. A l’escala de las regions Novèla-Aquitània e Occitània, aquò representa una desena de sites que forman un pauc mai de 400 estudiants cada annada.

La question del recrutament dins aquelas filièras demòra un vertadièr enjòc per aqueles Establiments : la casuda dels efectius d’escolans inscrits en opcion occitan al licèu, consecutiva subretot de la reforma del bachillerat de 2018, comença a se far sentir sus las cohortas e cèrtas filièras se tròban menaçadas. Pr’aquò, jamai los besonhs de professionals occitanofòns son pas estats tan importants, tanben dins la foncion publica (sonque dins l’ensenhament, de nombroses pòstes d’ensenhaires aurián besonh d’èsser provesits cada annada per respondre als besonhs) que dins lo sector privat (en 20 ans, lo nombre d’entrepresas qu’utilizan l’occitan per lor estrategia marketing es estat multiplicat per 4).

Una difusion tre la dintrada 2022

Aquel document serà difusat tre la dintrada de 2022 près dels liceans e dels estudiants. Aquela operacion de comunicacion correspond sonque a una de las accions desplegadas per las Regions per encoratjar l’aprentissatge e l’estudi de l’occitan. Una convencion es per exemple en cors d’elaboracion amb l’ONISEP. De relais son en cors de desplegament via los environaments numerics de trabalh (ENT) dels escolans e los centres d’orientacion de cada departament. L’estructuracion de las filièras professionalas es egalament un chantièr que se dobrirà lèu lèu.

 

Ofici public de la lengua occitana

22 bd maréchal Juin
31406 Tolosa cedex 9

Tel 05 31 61 80 50

contact@nullofici-occitan.eu

Scroll to Top