Coneissètz “Ma tèsi a l’Ofici” – Quasèrn de recèrca en sociolingüistica occitana ?

Desempuish adara 2 ans, l'OPLO qu'arcuelh ua doctoranta en sociolingüistica, Marie Sarraute-Armentia, dens l'encastre d'ua convencion CIFRE (Convencion Industriau de Formacion per la REcèrca).

Si lo son tribalh de recèrca ei luenh d’estar acabat (la tèsi qu’ei un maraton, pas un esprint !), nat besonh pr’aquò d’esperar la soa sostenença entà dar un uelhat suu son tribalh ! Que sufitz en efèit d’anar seguir las soas aventuras suu son blòg de tèsi, Ma tèsi qu’a l’Ofici : Quasèrn de recèrca en sociolingüistica occitana.

Peu miei deus bilhets d’aqueth blòg bilingüe, que la seguiratz atau suu terrenh, de collòqui en talhèr de vulgarizacion, de reflexion en cambiament de direccion, shens oblidar los concèptes e metòdes qui manipula.

Carta d'identitat de cercaira

  • Nom : Sarraute-Armentia
  • Prenom : Marie
  • Aucupacion : doctoranta a l’universitat Bordèu Montanha e a l’Ofici public de la lenga occitana
  • Disciplina : sciéncias deu lengatge
  • Objècte de la recèrca : las representacions sociaus de l’occitan en l’ensenhament escolar
  • Objectiu de la recèrca : compréner los lhevaders de motivacion, mes tanben los frens, a l’inscripcion d’escolan.as en cors d’occitan e en parcors escolar dab l’occitan com lenga d’ensenhament, entà formular preconizacions qui an per mira d’aumentar lo nombre d’escolan.as qu’aprenen l’occitan. 

Los nostes articles « còp de còr » entà començar la lectura deu blòg

Seccion « Vulgarizacion » :

  • Nueit Europèa de las/los Cercaire/as 2021 : cada an, grans eveniments de vulgarizacion d’endom nacionaunacionau, quitament internacionau, que balhan a las/los cercaire/as l’escadença (e sustot los mejans) de har conéisher lo lor tribalh e los sons enjòcs au public gran. A Bordèu, lo CCSTI (Centre de Cultura Scientifica Tecnica e Industriau) Cap Sciéncias qu’amassa cercaire/as deus diferents establiments de recèrca bordalés. Marie que participè a l’edicion 2021 suu tèma deu « viatge ».
  • PubhD : recèrca e inventivitat ne son pas antinomicas e n’i a pas nat limit a la creativitat de las/los cercaire/as ! Nombrosas iniciativas de partatge de cultura scientifica qu’existeishen atau en dehòra de las institucions. Per exemple, e sabetz que podetz encontrar doctorant.as a l’estanquet ?!

Seccion « Comunicacion scientifica » :

  • Postèr scientific (en anglés) au 24au simpòsium de sociolingüistica, a l’universitat de Gant (Belgica) : la sciéncia qu’avança de faiçon collegiau e contrarotlada, e qu’ei en sosméter las lors resultas a collòquis, puish a revistas scientificas, que las/los cercaire/as e hèn conéisher e « validar » lo lor tribalh. Segon las disciplinas, las lengas de comunicacion dens los collòquis internacionaus que pòden variar, mes l’anglés qu’a tendéncia a s’impausar. La fòrma deu postèr scientific qu’ei a còps considerada com ua fòrma inferiora de comunicacion scientifica, privilegiada per las/los cercaire/as novíci.as ; que s’ageish pr’aquò d’un mòde de comunicacion plan visuau, particularament adaptat a la comunicacion de resultas en esquèmas e grafics, qui lo public a lo parat d’espiar en detalh, au contra d’ua comunicacion orau. Dens aqueth article, descobritz las prumèras resultas deu questionari d’enquèsta en linha que Marie difusè a la prima 2022 (dilhèu qu’i responós vos medish !).
  • Comunicacion en binòmi dens un collòqui de joen.as cercaire/as a Lion : segon las disciplinas, qu’ei mei o mensh corrent de tribalhar sol.a o a mantun sus un projècte de recèrca, e donc tanben sus la comunicacion de las resultas d’aquera recèrca. D’un aute costat, lo màger-mot de la recèrca en sciéncias umanas dens lo 3au millenari qu’ei l’interdisciplinaritat, qu’ei a díser, la collaboracion de mantua disciplina dens lo tractament d’un medish objècte d’estudi. Dens aqueth article, Marie que conta la soa collaboracion dab ua doctoranta en antropologia sociau e culturau entà méter en plaça un protocòle d’observacion entà collectar dadas de recèrca sus las representacions sociaus de l’occitan pendent un talhèr de vulgarizacion.

Seccion « Concèptes e metòdes » :

  • Las representacions sociaus : perqué estudiar las representacions sociaus de l’occitan ? Quau interès dens lo contèxte de las politicas lingüisticas de revitalizacion de las lengas regionaus ? Retrobatz quauquas definicions e exemples dens aqueth article.

Retrobatz lèu un article suu metòde d’analisi combinada de las representacions sociaus de las lengas dens aquera seccion !

Seccion « Ma vita de doctoranta » :

  • Ma tèsi a la Rochèla : aquera seccion, qui non compòrta pas per ara qu’un sol article, qu’ei pensada com un vertadèr jornau de viatge de doctoranta, on l’escritura scientifica e normalizada que dèisha plaça aus racontes d’aventuras e autes questionaments introspectius. Dens aqueth article, Marie que torna sus la soa experiéncia dens lo concors de vulgarizacion « Ma tèsi en 180 segondas » a la prima de 2021.

Ofici public de la lengua occitana

22 bd maréchal Juin
31406 Tolosa cedex 9

Tel 05 31 61 80 50

contact@ofici-occitan.eu

Scroll to Top