Un « Plan d’accion licèu » per desviar la baissa d’escolans que causisson d’aprene l’occitan al licèu

L’OPLO lança son Plan d’Accion Licèu

Un dispositiu per desviar la baissa d'escolans que causisson d'aprene l'occitan al licèu

-40% de liceans occitanistas en 5 ans

Dempuèi 2018, los actors de l’ensenhament de las lengas regionalas alèrtan sus las consequéncias de la reforma del bachilherat suls efectius d’escolans que causisson aquela opcion en 2nda, 1èra e Terminala. Amb d’ensenhaments d’especialitat mai importants dins l’emplec del temps e una valorizacion mendre de las opcions a l’examèn, de mens en mens d’escolans causisson l’opcion occitan al bachi. Las chifras del ministèri de l’Educacion nacionala* son sens apèl : la baissa depassa las 32% dempuèi 2019 (-40% dempuèi 2016), mentre que los efectius rèstan estables fins en 3na.

Davant aquel estat de fach, que fa pesar de perilhs reals sus la transmission de la lenga (totjorn considerada coma en « grand perilh de desparicion » per l’UNESCO), d’ajustaments son a l’estudi pel ministèri, per una intrada en vigor esperada tre la session 2022 del bachillerat.

De cap a n’aquela situacion fòrçapreocupanta, l’OPLO decidiguèt de reagir en tot lançar un « Plan d’accion licèu » per l’annada venenta. Ara, lo licèu es doncas la prioritat màger de l’accion de l’Ofici per l’annada 2021/2022.

Mai de 200 000€ per invertir la tendéncia dins los licèus de Novèla Aquitània e d'Occitània

Diferentas accions seràn menadas, en ligam amb lo ministèri de l’Educacion nacionala e amb lo sosten de las doas Regions Novèla-Aquitània e Occitània, a l’entorn de tres objectius : prepausar de ressorsas innovantas als escolans que seguisson ja un ensenhament en occitan, sensibilizar los autres als beneficis de son aprendissatge e melhor valorizar los « bonas practicas » identifacadas dins cèrts establiments.

Un budgèt excepcional de mai de 200 000 euròs es estat desgatjat per tal de començar aquelas accions (16 en tot) alprèp dels diferents licèus. Totes los establiments de las regions Novèla-Aquitània e d’Occitània seràn concernits. Concretament, s’agirà d’una part de tornar endralhar d’accions ja existentas per las centrar sul licèu (ex : chèc-libre, jornadas de sensibilizacion, campanhas d’afichatge…), d’una autra de generalizar d’accions innovantas per donar lo gost de l’aprendissatge  de la lenga (èx: escape game, concors de creacion, ambaissadors…).

 

Un desplegament complet per la dintrada 2022

Lo desplegament d’aquel plan d’accion licèu es previst en doas annadas escolaras, amb una accion globala de sensibilizacion alprèp dels establiments a la dintrada 2022. En tot, aquela iniciativa de l’OPLO, inedita per son objècte, son budgèt e son amplor concernirà 635 establiments del 2nd gra.

Una avaloracion completa del dispositiu serà realizada a l’eissida de la session 2023 del bachilherat.

Ofici public de la lengua occitana

22 bd maréchal Juin
31406 Tolosa cedex 9

Tel 05 31 61 80 50

contact@nullofici-occitan.eu

Scroll to Top