Elegits/idas d'una collectivitat, desiratz formar vòstres agents a l'occitan gràcias a la formacion professionala ? L'OPLO vos acompanha !
Dins l’encastre de son « kit collectivitats », l’OPLO ven d’editar una novèla ficha destinada a promòure la formacion lingüistica dels agents de las collectivitats.
Quals beneficis per las collectivitats localas ?
La formacion professionala en lenga occitana consistís a far aquerir als agents de las collectivitats de competéncias lingüisticas de diferents nivèls. D’organismes especializats e certificats cobrisson l’ensemble del territòri. Prepausan de formacions en grop, individualas, en presencial o a distància.
L’occitan essent una lenga romanica (tot coma lo francés, lo portugués, l’italian o l’espanhòl), qualquas setmanas d’aprendissatge permeton generalament d’arribar a un nivèl sufisent per comprene la tenor d’un escambi, legir o escriure un tèxt simple o s’exprimir a l’oral.
Afortir las competéncias lingüisticas en occitan dels agents d’una collectivitat presenta un interès per :
- Melhorar las activitats professionalas o las competéncias que mobilizan sus d’unes pòsts de trabalh (per exemple : ATSEM de las escòlas prepausant un ensenhament de l’occitan, agents ligats a las activitats toristicas o culturalas) ;
- Completar lo plan de formacion de la collectivitat en i integrant una dimension occitana ;
- Permetre als agents d’obtenir una certificacion reconeguda a l’escala europèa (de nivèl A1 al nivèl C1) ;
- Sensibilizar los agents a la lenga e a la cultura de lor territòri ;
- Estimular l’adesion dels agents a un projècte de territòri global.
Incitar las collectivitats e los acompanhar dins lor demarcha
L’edicion d’aquela ficha s’inscriu dins una demarcha d’acompanhament de las collectivitats volontàrias per l’OPLO. Un « kit collectivitats » serà lèu editat e difusat a l’escala interregionala.
