En 2021, capidatada inedita de las certificacions en occitan

Augan, 83 personas se sont inscritas per presentar lo DCL (Diploma de compétencia en lenga) occitan. L’an passat, èran 15.

Un recòrd de diplomats al DCL occitan

Es un recòrd absolut que ven d’èsser confirmat pels servicis del Ministèri de l’Educacion nacionala. En 2021, 83 personas se son inscritas per presentar lo DCL occitan dins las regions Novèla-Aquitània e Occitània (territòri cobèrt per l’Ofici public de la lenga occitana – OPLO). Los resultats, comunicats aquela setmana, fan estat d’un nombre inegalat de diplomats : 77 personas, contra 14 en 2020 e 18 en 2019.

Aquel succès ten en granda partida a la dubertura en 2021 d’un centre d’examèn dins la vila de Limòtges, ont prèp de 20 personas passèron lor examèn del DCL occitan lo 26 de mai darrièr. La tendéncia se confirma dins totes los autres centres d’examèn de Bordèu, Tolosa e Montpelhièr.

Una fòrta demanda dels actors economics, socials e culturals

Dempuèi mantunas annadas, l’OPLO acompanha las organizacions economicas, socialas e culturalas dins una demarcha de certificacion de las competéncias comunicacionalas en occitan de lors actors. Concretament, l’Ofici pren en carga 80 % de dels fraisses d’inscripcion a l’examèn del DCL. Lo perfil-tipe del diplomat de 2021 es una persona jova (mens de 40 ans), de totes nivèls de lenga (de A1 a C1, segon lo barèma del referencial europèenc de las lengas) e en activitat (servicis a la persona e a la collectivitat).

Charline CLAVEAU, presidenta de l’OPLO, precisa : « Aquelas chifras tradusisson un besonh real dels professionals de nòstras regions de far certificar lors competéncias en lenga occitana. Lo dispositiu concernís tan los salariats, que los demandaires d’emplec, los estudiants, los particulars, los estagiaris en formacion professionala coma los titulars en formacion contunhada. La màger part dels diplomats son de professionals de l’ensenhament, del mond de las arts e de la cultura, mas tanben dels mèdias, de l’animacion, de la santat e de l’ajuda a la persona ».

De partenariats renforçats per las annadas a venir

Una convencion amb lo Centre nacional del DCL, basat a Marselha, es estada signada per tal de poder garantir una ofèrta de certificacion sus l’ensemble de las 4 acadèmias de las regions Novèla-Aquitània e Occitània (Bordèu, Limòtges, Montpelhièr, Tolosa). « Devèm èsser en mesura de prepausar a totes los professionals qu’o desiran de poder far certificar lors competéncias en occitan, conclutz Charline CLAVEAU. Per cèrts entrepreneires, la mobilizacion de la lenga occitana, perque veïcula de valors de proximitat, d’autenticitat e de durabilitat es una faiçon de proclamar un estacament a un territòri, en tot  se dobrir a l’autre e en se virant de cap a deman ».

 

Ofici public de la lengua occitana

22 bd maréchal Juin
31406 Tolosa cedex 9

Tel 05 31 61 80 50

contact@ofici-occitan.eu

Scroll to Top