E perqué pas har l’obertura de las Hèstas de Baiona en occitan?
Despuish 2004, la vila de Baiona en partenariat dab Lo Congrès permanent de la lenga occitana que hè aunor a las soas tres lengas, lo francés, l’euskara e l’occitan en har enténer enter autas los vèrs deu Prosei, òda a la vila e a las hèstas.
Aqueth poèma qu’ei vadut pro viste ua sòrta de canta a respóner enter ua personalitat qui declama los vèrs au balcon ( lo Landès Richard Dourthe en 2007, lo Biarnés Jean Michel Larqué en 2008, l’Acadiana Natasha Saint Pier en 2013, lo Baionés Farid Amziane en 2023…) et detzenats de milèrs de festaires amassats davant la Mairia.
Augan, qu’ei lo Joan de Nadau qui declamarà lo prosei e que cantarà la soa famosa « Encantada ».
Après aqueth gran moment de comunion, que poderatz passar lo pont sant Esperit ta’n cantar quauquas autas à l’Estanquet gascon de l’Academia Gascona de Baiona…
L'estiu occitan dab l'Ofici
Pendent las vacanças escolaras, l’Ofici que prepausa suus sons hialats « quartièrs d’estiu lingüistics » a la carta.
A cada pòst, un eveniment, gran, mejan, petit…
Eveniments qui’vs haràn viatjar dens los 22 departaments deu perimètre prioritari d’intervencion de l’Ofici.
Eveniments qui hèn víver la lenga occitana per la poesia, lo conte, lo cant, la musica, la randolejada, las arts plasticas, lo cinèma, la creacion de podcast…
Aquera seleccion, subjectiva, umila e afichada com tala, qu’ei estada realizada peus desvolopaires de l’Ofici a partir
- de la cartografia de l’Observatòri partenarial deus actors accessibla ací : https://www.jemejettealoc.com/loc-pres-de-chez-vous/
- de l’agenda collaborativa CalenDiari accessibla ací: https://openagenda.com/fr/occitan
- de la coneishença deu terren de cadun deus desvolopaires
- de la lor set mei que vadenta d’evasion(s) estivau(s)
