Aicí comença una seria de publicacions que senton las vacanças mas pòdon balhar tanben d’idèas !
Idèas de sortidas e de destinacions pendent l’estiu !
Idèas de projèctes de declinar e montar a la dintrada !
Las vacanças escolaras començan uèi diluns 07 de julhet e acabaràn lo diluns 1èr setembre.
Los mainatges son en vacanças e los adults… pas forçadament, o pas tot lo temps, o pas a l’encòp.
Per consequent, avèm decidit de vos prepausar sus nòstras rets en julhet e en agost de « quartièrs d’estiu occitans » a la carta.
A cada pòst, un eveniment, grand, mejan, pichon, …
Dels eveniments que fan viure la lenga per la poesia, lo conte, lo cant, la musica, l’escorreguda, las arts plasticas, lo cinèma, la creacion de podcast de faiçon originala…
Aquela seleccion, subjectiva, umila e afichada coma tala, es estada realizada pels desvolopaires de l’Ofici a partir de la cartografia de l’Observatòri partenarial dels actors accessibla aicí ( https://www.jemejettealoc.com/loc-pres-de-chez-vous/), de l’agenda collaborativa CalenDiari (https://openagenda.com/fr/occitan), de la coneissença del terren de cadun dels desvolopaires, de lor set mai que naissenta d’evasion(s) estivala(s).
Primièra etapa
Aprene la cosina lemosina amb J.M. Caunet de l’IEO Lemosin o la polifonia occitana amb Manu Théron e Damien Toumi del Duò Lavoà Lapò en plen còr de la Tarn e Garona
Aquò se passa a l’Universitat occitana de La Guépia (Tarn e Garona) que comença deman, 8 de julhet fins al 13 de julhet.
Programa complèt sus : https://www.lengaviva.com/universite-occitane-2025/?lang=fr
