Taula redonda sus la recèrca e l’occitan

Un eveniment inedit organizat dens l'encastre de la Hèsta de la Sciéncia 2021

Dens l’encastre deus 30 ans de la Hèsta de la Sciéncia, l’Ofici public de la lenga occitana (OPLO) qu’organiza lo 6 d’octobre que vien un eveniment  ibride (en presenciau e a distància) suus enjòcs de la recèrca sus l’occitan en Novèla-Aquitània.

Inscríver l’occitan dens un gran eveniment popular e a gratis

La Hèsta de la Sciéncia qu’ei un eveniment organizat peu Ministèri de l’Ensenhament superior, de la Recèrca e de l’Innovacion. Desempuish 1991, que’s debana cada annada aus mes d’octobre e de noveme. Que s’agís d’un eveniment incontornable de cultura scientifica que prepausa dètz dias de manifestacions a gratis en França metropolitana, otramar e a l’internacionau.

Ad aquera ocasion, milièrs d’actors scientifics mes tanben culturaus e pedagogics s‘amassan entà partatjar dab lo public lor entosiasme tà las sciéncias, las tecnicas e las innovacions.

Entà d’aquera edicion 2021, l’OPLO qu’a desirat inscríver l’occitan dens lo programa oficiau (www.fetedelascience.fr) en tot organizar un eveniment de vulgarizacion de la recèrca sus l’occitan au près deu gran public.

Se la Hèsta de la Sciéncia que permet cada annada de sensibilizar lo public a la sciéncia e a sons enjòcs e de favorizar lo despartiment deus sabers enter cercaires e ciutadans, que permet tanben de valorizar lo tribalh de la comunautat scientifica e suscitar vocacions en çò deus joens.

Brembar que l’occitan qu’ei un objècte scientific… en Novèla-Aquitània e delà

En Novèla-Aquitània, la lenga occitana qu’ei un objècte scientific sancer : es estudiada dens mantuas universitats, que hè l’objècte de publicacions, de projèctes de recèrca, mobiliza ua comunautat importanta de cercaires. Qu’ei tanben lo cas dens las autas regions de l’espaci occitan e, delà, dens mantuns país deu monde.

La taula redonda deu 6 d’octobre (16ò) qu’a per mira de presentar las diferentas practicas de recèrca e d’explicar com las conclusions de l’ensemble d’aqueths tribalhs que permeten d’afinar l’estrategia de reconquista engatjada entà har en sòrta que los abitants se tornen arrecaptar la lenga occitana, entà que siá un còp de mei parlada e transmesa. 

 

Aqueth eveniment qu’ei estat labellisat peu Ministèri de l’Ensenhament superior, de la Recèrca e de l’Innovacion e beneficia d’ua subvencion dens l’encastre d’un partenariat dab Cap’Sciéncias.

 

Ofici public de la lengua occitana

22 bd maréchal Juin
31406 Tolosa cedex 9

Tel 05 31 61 80 50

contact@nullofici-occitan.eu

Scroll to Top