Signatura d’una convencion de cooperacion e de complementaritat entre l’Ofici public de la lenga occitana e lo Departament de Dordonha :

un acte fòrt e estructurant per lo desvolopament de l’occitan en Peirigòrd

  Una volontat partatjada de cooperacion a l’entorn de la lenga occitana

Lo Conselh departamentau de Dordonha e l’Ofici public de la lenga occitana menan conjuntament de las accions volontaristas en favor de la transmission e de la socialisacion de la lenga occitana dempuei mai d’unas annadas desjà. Per lo Departament, aquò se concretiset tre 2012 per l’adopcion d’un eschema departamentau de desvolopament de la lenga e de la cultura occitanas. Aquò es estat reconduch en 2015 per la novèla assemblada departamentala, permetent entau de consolidar e de confirmar las accions precedentament engatjadas. Per sa part, l’Ofici public de la lenga occitana se dotet fin 2018 d’orientacions estrategicas prenent la fòrma d’un plan d’accion pluriannuau. Se declina en 12 mesuras que visan a favorisar e desvolopar l’aprentissatge e l’usatge de la lenga occitana.

Per aquela convencion, los partenaris reconeissen e estructuren la complementaritat de las demarchas menadas per chascun d’entreilhs. L’Ofici reconeis lo caracteri eficient e estructurant de l’eschema departementau de desvolopament portat per lo Departament sus lo territòri de Dordonha, mentre que lo Departament reconeis la necessitat de la mesa en plaça d’una cooperacion a l’eschala regionala e interregionala, permetent de recerchar e optimizar lurs champs d’intervencion en favor de la lenga occitana.

  Lo Peirigòrd, un laboratòri propici a las experimentacions dedicadas a la lenga occitana

La Dordonha es lo prumier departament de Novèla-Aquitània e d’Occitània a signar una convencion de cooperacion coma l’Ofici public de la lenga occitana. Aqueu engatjament significatiu visa l’implicacion e l’estachament d’un territòri tot entier a sa lenga, entau coma nos lo rapela la darrièra enquesta sociolinguistica en data que fai de Dordonha lo dapartament de l’ex-Aquitània onte la lenga occitana es la mai practicada.

  Una convencion que se tradusís per de las accions concretas :

1/ Consolidar e desvolopar l’ensenhament de l’occitan

Aqueu sector es principalament regit per las convencions cadre e academicas signadas per l’Educacion nacionala, l’OPLO e los Departaments volontaris dau domeni occitan. S’agís principalament de far frosar l’oferta d’ensenhament bilingua francés-occitan de la mairala au liceu a rason d’una dubertura de cursus chada an. Per alhors, la jornada occitana de liason collegi-liceu que se debanet lo 11 d’octobre passat fuguet un exemple dau liam estrech emb l’Ofici public de la lenga occitana. Fai partida de las accions perifericas de politica linguistica comunas que permeten de consolidar los fialats dens l’ensenhament segondari.

2/ Créisser la visibilitat de la lenga dins l’espaci public

La socialisacion de la lenga es un chantier estrategic que constituís una prioritat per lo Departament e l’OPLO, tant lo deficit d’imatge se fai sentir. Audelà de la produccion d’espleitas communas qui visarán a valorizar l’ensenhament de l’occitan, la convencion prevei a mejan termi de realizar de las campanhas de comunicacion sus lo territòri per fin de rendre l’occitan mai atractiu e mai vesedor.

3/ Renforçar l’evaluacion de la politica lingüistica publica

En parallela de la creacion d’un observatòri de la lenga occitana en 2020, l’OPLO vai lançar una enquesta sociolingüistica sus los 22 departaments de las regions Novèla-Aquitània e Occitània. Lo Departament de la Dordonha es plenament associat a ‘n’aquela demarcha perque considera indispensable d’apuejar son intervencion coma de las donadas chifradas e actualizadas. Aquela enquesta es l’ocasion per lo Conselh departmentau e l’Ofici public de la lenga occitana d’obténer daus elements nuòus sus las practicas e las representacions qu’an nòstres conciutadans de la lenga occitana d’anuei. Aqueu tipe d’accion permet notadament d’evaluar los efiechs que la politica lingüistica publica engendra sus los territòris nòstres.

Ofici public de la lengua occitana

22, bd Maréchal Juin
31406 Tolosa cedex 9

Tel 05 82 60 02 80

Scroll to Top