Reaccion conjunta au recors contra la lei Molac sus las lengas

Comunicat de premsa
27 d’abril de 2021

“Nosaut(a)s, Presidentas e President deus Oficis publics de las lengas basca, bretona, catalana e occitana, que nos impòrta hèra d’exprimir amassa la nosta desahida, la nosta incompreension e lo noste desplasèr davant la sasina deu Conselh Constitucionau sus la lei Molac relativa a la proteccion de las lengas regionaus e a la lor promocion.

Despuish annadas, la construccion de las politicas publicas en favor de las lengas regionaus e l’accion deus actors de terrenh que se tuman a un quadre juridic pro clavat e a trebucs e travas nombrós e recurrents dens mantuns domenis.

Rapòrt a n’aquò, la lei Molac que pòrta un quadre legau que permet de securizar practicas larjament espandidas suus nostes territòris e d’anar de cap tà un desvolopament facilitat e perenne. Qu’estó escrivuda e portada dens un esperit de construccion d’un consensus larg que lo vòte majoritari deu 8 d’abriu passat a clarament confirmat.

Lo recors davant lo Conselh Constitucionau hèit per 61 deputats aqueth 22 d’abriu, que va au contra d’aqueth consensus, qu’ei de dòu har e qu’u avem degreu.

Qu’esperam ua desgessida positiva, e que demoram encarats a obrar entà har vàler un quadre legau facilitator e rassegurant, qui permétia l’espandiment d’ua politica publica volontarista responent a ua demanda sociau e a un consensus societau, politic e institucionau que contunharàm a lhevar e acompanhar”.

Charline CLAVEAU
Presidenta de l’Ofici public de la lenga occitana
Conselhèra regionau delegada de Novèla-Aquitània

Antton CURUTCHARRY
President de l’Ofici public de la lenga basca
Vice-president de la Comunautat d’aglomeracion País-Basc

Carole DELGA
Presidenta de l’Ofici public de la lenga catalana
Presidenta de la Region Occitania Pirenèus-Mediterranèa

Lena LOUARN
Presidenta de l’Ofici public de la lenga bretona
Vice-Presidenta de la Region Bretanha

Los oficis publics de las lengas basca, bretona, catalana e occitana son personas moraus deu dreit public cargats de concebre e implementar una politica lingüistica publica e concertada a l’escala de lor territòri. Mai largament, an per mission la promocion de lor lenga e lo desvolopament de lor usatge a totes los nivèls. Collabòran amassa per acompanhar aquelas dinamicas a l’escala nacionala.

Contact premsa Bretanha : Lena LOUARN –06 07 19 27 63 / opab@nullopab.bzh
Contacte premsa Pirenèus-Orientaus (Catalonha Nòrd) : Pierre LISSOT – 04 11 81 95 85 / pierre.lissot@nulloplcat.eu
Contact premsa Nouvèla-Aquitània/Occitània : Gaël TABARLY – 07 56 27 27 07 / gael.tabarly@nullofici-occitan.eu
Contact premsa País basc : Olivier MIOQUE – 05 59 31 13 17 / o.mioque@nullmintzaira.fr

Ofici public de la lengua occitana

22, bd maréchal juin
31406 Tolosa cedex 9

Tel 05 31 61 80 50

contact@nullofici-occitan.eu

Scroll to Top