Divendres de ser darrièr, après la victòria del Estadi Tolosenc de cap a l’Aviron Baionés en semifinala del Top 14, avem pogut descobrir en dirècte la devisa de la vila « Per Tolosa totjorn mai ».
E es lo jogaire… escocés Blair Kinghorn que n’es estat o pòrta-bandièra dins una dança endiablada de comunion amb los suportaires rogs e negres.
Lo mond del rugbi occitan reivindica en efièch de mai en mai la lenga del país coma un element de l’identitat del club, coma generator de coesion amb lo territòri e coma factor de singularitat per l’imatge del club e del territòri.
Aviam descobèrt gràcias a Òctele que la Seccion Paulina fasiá viure la lenga
dins las tribunas amb los cantaires amassats per La Ciutat,
dins lor comunicacion (« Honha Seccion! »), en relevant sus las rets los comentaris fogoses sustot de Silvan Carrère e de Ludovic Jouanserre sus Ràdio País (Video del dròp de Simmonds comentat en Occitan dins lo Top 8 dels contenguts mai vistes!),
e fins dins los noms de las salas del centre d’entrainament, gràcias a una collaboracion amb Lo Congrès Permanent de la Lenga occitana !
Èra donc lo torn de l’Estadi Tolosenc dissabte de ser de portar amb glòria la lenga occitana.
Mas volem pas prene partit en vista de la finala del Top 14; de tot biais, serà un grand club occitan qu’emportarà l’Escut de Brennus… mas nos agradariá de reveire « Per Tolosa, totjorn mai » en occitan lengadocian, levat que l’Union Bordèu Begla (UBB) estampa d’aicí dissabte dels panèls en version gascona « Per Bordèu, totjorn mèi », o encara melhor, « Plan har e deishar díder »(anciana devisa de l’Estadi Atletic Bordalés Rugbi).
Dins los dos cases, es la lenga occitana dins sa diversitat que ganha coma un objècte social partible e federator !
