L'OPLO lança sa cadena d'eveniments en dirècte sus la platafòrma Twitch. Lo primièr eveniment se farà dins l'encastre de la Fèsta de la Sciéncia, en partenariat amb lo ministèri de l'Ensenhament superior e de la Recerca.
Twitch, coneissètz? Es lo servici de difusion vidèo en dirècte (streaming) fòrça conegut dels joves e de totes los jogaires en ret. Òm sap mens que la platafòrma permet tanben la difusion de contenguts a caractèr informatiu o educatiu dont lo nombre aumenta de faiçon exponenciala aqueles darrièrs meses. Per de mèdias coma Arte o França.tv o ben tot de las institucions coma l’Assemblada nacionala, Twitch es vengut un mejan de conquistar un public de mai en mai alunhat dels canals d’informacion convencionals, en li prepausant d’interagir en dirècte suls subjèctes que los tòcan.
L'Ofici public de la lenga occitana lança sa cadena sus Twitch
La visibilitat de l’occitan sus Internet e sus las rets socialas es venguda, en qualques annadas, un enjòc prioritari per la transmission e lo desvolopament de la lenga occitana. Al delà de las iniciativas institucionalas, creadors de contenguts occitanofònes se son lançats sus Youtube, Instagram, Snapchat o TikTok, e dels grops de locutors se crèan espontanèament sus de servicis de messatjariás o de servidors privats de tipes WhatsApp, Telegram o Discord. En lançant sa cadena Twitch, l’OPLO desira investir aquela nòva ret per i experimentar la difusion de contengut en ligam amb la vulgarizacion scientifica de l’occitan.
Un 1er eveniment organizat dins l'encastre de la Fèsta de la Sciéncia
Un primièr eveniment en linha serà aital difusat lo 11 d’octobre de 2022 a 17h dins l’encastre de la Fèsta de la Sciéncia. Aquel eveniment, labelisat pel ministèri de l’Ensenhament superior, de la Recerca e de l’Innovacion, la Region Occitània e las coordinacions regionalas, consistirà a debatre a l’entorn del subjècte « Biodiversitat e diversitat de las lengas: quina(s) lenga(s) per pensar e viure lo mond de doman? ».
