Après una annada escolara 2024-25 de transicion e de prefiguracion del projècte novèl, lo Cap’òc, servici del Malhum CANOPÉ, dispausa ara d’una equipa plenament operacionala.
Lo Cap’òc es un servici de l Malhum Canopé en carga de la produccion de material pedagogic en ligam amb los besonhs dels ensenhaires d'occitan e en occitan, del primari coma del segondari.
A tanben per mission d’acompanhar los ensenhaires d’occitan e en occitan (professors bilingües o de DNL dins lo segondari) que desiran un sosten o conselhs d’òrdre pedagogic.
Per menar son programa, lo Malhum Canopé es sostengut en tèrmes de mejans per l’Educacion nacionala, las regions Novèla Aquitània e Occitània (per l’Ofici Public de la Lenga Occitana) e los departaments de Dordonha e de Pirenèus Atlantics.
Las missions
Las missions del Cap’Òc, plenament intercademicas, son rajustadas a l’entorn de l’edicion e la mesa a disposicion de ressorsas pedagogicas en occitan:
- La traduccion de manuals e de tot autre obratge destinat a l’ensenhament de la lenga e dins la lenga pel 1èr gra o lo segondari e lor difusion en version numerica o papièr ;
- La creacion o la traduccion d’obratges de literatura joventut e de tot autre supòrt d’ensenhament e lor difusion en version numerica o papièr ;
- La mesa a disposicion de las ressorsas pedagogicas editadas pel CAP’ÒC aital coma lor acompanhament pedagogic pel sit novèl internet (www.capoc.fr)
- L’acompanhament dels ensenhaires desirant utilizar aquelas ressorsas dins lor classa e lor didactisation. L’equipa es a la disposicion dels ensenhaires pendent lor visita a la mediatèca de Pau o a Canopé Montpelhièr, e pòt participar a diferents estagis de formacion a la demanda dels formators.
Aquelas produccions son realizadas en occitan gascon, lengadocian e lemosin que son presents dins las acadèmias de Bordèu, Limòtges, Montpelhièr, Peitieus e Tolosa. Son destinadas a l’ensenhament immersiu, bilingüe, afortit (1èr gra) e opcional (2nd gra) presents dins aquelas acadèmias.
Lo foncionament
La concepcion del programa editorial annal del Cap’Òc s’apièja sus tres comitats, fisadors de sa pertinéncia respècte a las espèras del terren. L’Educacion nacionala (los IA-IPR d’occitan) e la direccion territoriala de Ret Canopé participan activament al seguit de cada comitat.
- Lo comitat de pilotatge (octobre): amassa los partenaris financièrs (departaments 64 e 24, Regions Novèla Aquitània e Occitània, l’OPLO). Aquel comitat definís las orientacions grandas aital coma los marges budgetaris permetent de projectar un programa pluriannal de produccions
- Lo comitat editorial (novembre): amassa los CPDs occitan, de las ensenhaires-ressorsas identificats e las IA-IPR d’occitan. Dins aquela instància son remontats los besonhs de terren.
- Lo comitat tecnic e pedagogic (genièr): amassèt los caps de servici e cargats de mission de las collectivitats e de l’OPLO. Aquel comitat estúdia e valida la factibilitat tecnica e financièra dels projèctes retenguts pel comitat editorial
Sortidas venentas
Validat pendent lo precedent programa editorial de 2025, un album joventut es estat traduch pels cicles 2 e 3 : « Al Reialme de las abelhas » paregut a las edicions Rebombeta ven de sortir. Coma totas las produccions del servici, passadas e a venir, es declinat dins las tres variantas presentas dins son perimètre d’accion: gascon, lengadocian e lemosin. Serà difusat al mes de decembre al près de totes los establiments dispausant d’un ensenhament bilingüe immersiu o afortit de l’occitan per aqueles dos cicles. Coma per totes los espleches meses a disposicion dels ensenhaires pel Cap’òc, un ensemble de proposicions d’espleitacions pedagogicas serà mes en linha sul sit www.capoc.fr.
Seguirà a la tota debuta de l’annada 2026 una creacion a l’entorn de comptinas pel cicle 1. S’agirà d’un cofret de 35 afichas A3 rècto-revèrs illustrant caduna una comptina en occitan. Es egalament concebut en ligam amb un acompanhament pedagogic.
Un ensemble de fichas de cultura e civilizacion occitanas tractant de personalitats occitanas celèbras e de las vilas grandas d’Occitània serà mes en linha sul sit del Cap’Òc al meteis periòde. Aquel esplech es concebut per respondre puslèu als besonhs de l’ensenhament segondari e serà completat cada annada per un tòm novèl.
Sortirà enfin dins los primièrs meses de 2026 una traduccion de l’esplech d’ensenhament de las sciéncias « Sciéncias a viure » pel cicle 2, una traduccion de l’obratge de las edicions Accèsses. Lo cofret d’activitats arribarà a totes los establiments assegurant un ensenhament bilingüe de l’occitan en cicle 2. Los complements numerics e lo guida del mèstre seràn disponibles per ligam de telecargament que serà enviat a aqueles meteisses establiments.
Per accedir als obratges anteriorament produches (dins lo limit dels estòcs disponibles), podètz contactar:
- Lo Cap’Òc : contact.capoc@reseau-canope.fr
- L’Ofici public de la lenga occitana : contact@ofici-occitan.eu
D’un autre costat, lo sit internet del Cap’Òc www.capoc.fr es estat tornat fondar per una accessibilitat melhora. Lo catalòg detalha totas las produccions e balha accèss per caduna d’ela a de pistas e d’exemples detalhats d’espleitacions pedagogicas.
En mai, a Pau, la mediatèca aculhís los ensenhaires e tot autre public :
- lo dimècres 9h-17h30
- lo dijòus 11h-17h
- lo divendres 9h-16h45 (per fin que los estudiants M1 M2 MEEF occitan pòscan accedir a las ressorsas sus lor temps de preséncia a l’INSPE)
- E mai la primièra setmana de cada periòde de vacanças, fòra Nadal.
Una equipa inter-academica a vòstre servici
L’equipa es basada sus dos sits de Réseau CANOPE :
- a Pau, 44 Baloard del Rector Jean-Sarrailh.
- a Montpelhièr, Talhièr Canopé 34, 360 Carrièra Michel-de-lo Hospital.
Aculhís en sos locals tot ensenhaire desirant un acompanhament.
L’equipa es compausada de tres ensenhaires meses a disposicion per l’Educacion nacionala (2 del rectorat de l’acadèmia de Bordèu e 1 ensenhaira de l’acadèmia de Montpelhièr) aital coma d’una cap de projècte transmédia remunerada per Ret Canopé.
Patrick Guilhemjoan – Coordinator e referent gascon pel segond gra – Siti de Pau
Professor agregat d’occitan, ensenha dempuèi quasi trenta ans e a una experiéncia de l’ensenhament dins lo primari, lo segondari e lo superior. A egalament ensenhat l’anglés dins l’encastre de sa bivaléncia.
A publicat de diccionaris, una gramatica e de metòdes d’ensenhament de la lenga. Es enfin doctor en lenga e literatura occitanas.
Estèle Lama – referénta lengadocian e lemosin pel segond gra – Siti de Montpelhièr
Professora agregada d’occitan, a una experiéncia de trenta ans d’ensenhament de l’occitan e del francés dins lo segond gra dins d’establiments publics de l’Educacion Nacionala e del ministèri de l’Agricultura d’Erau. A publicat d’obratges pedagogics a destinacion del primièr e del segond gra. Contunha d’ensenhar l’occitan dins lo mitant associativa.
Dins lo Cap’òc trabalha essencialament suls contenguts pedagogics.
Christine Nougué-Debat – Cap de projècte transmédia – Siti de Pau
Après 8 ans d’experiéncia a l’Institut Occitan (Vilhèra – 64) coma cargada de desvolopament, a integrat l’equipa del Cap’ÒC en 2008 coma infografista ; es cap de projèctes transmédias dempuèi 2017 e s’ocupa principalament de la partida edicion, de la redaccion dels contractes a la transmission dels fichièrs a l’estampaire en passant per la recèrca d’estima, la mesa en pagina, etc. Participa sovent a la concepcion e es egalament en carga del siti internet.
Titulara d’una mestresa de geografia, d’una licéncia d’administracion publica e d’una licéncia d’istòria de las arts, e fòrta de 17 ans d’experiéncia al Cap’ÒC, es un pauc la generalista de l’equipa.
Benjamin Salinas – referent gascon primièr gra – Siti de Pau
Es professor de las escòlas dempuèi 2000 (Asasp puèi Issòr) e a ensenhat en classa bilingua a l’escòla de La Seuva de 2006 a 2025.
Es estat recebut al CAPES de fisica-quimia en 2017. Es estat formator al Cfp’òc de 2023 a 2025.
Tota l’equipa del Cap’Òc es a vòstra disposicion per reculhir vòstras suggestions e remarcas.
