Dins l’encastre de la Fèsta de la Sciéncia, l’Ofici public de la lenga occitana, en partenariat amb lo CIRDOC – Institut occitan de cultura, organiza lo 11 d’octobre a 17ò un debat en linha a l’entorn del tèma « Biodiversitat e diversitat de las lengas: quina(s) lenga(s) per pensar e viure lo mond de doman ? ».
Mentre que la tendéncia generala es de se dirigir cap al tot-anglés, lenga unica internacionala que poiriá garantir los escambis entre ciutadan.es del mond, de nombrosas recercas scientificas e demarchas ciutadanas a contracorrent meton al contrari en avant l’interès de la diversitat de las lengas per bastir lo mond de deman, quitament, per prepausar de las solucions alternativas als problèmas societals e environamentals a los quals deurem inevitablement far fàcia. L’avenidor serà al bi-plurilingüisme.
La taula redonda del 11 d’octobre (17h) s’inscriu dins la tematica nacionala de l’eveniment «Rescalfament climatic: atenuacion e adaptacion» e preten presentar diferents trabalhs de recerca e de vulgarizacion portant sus la plaça de las lengas, e subretot de l’occitan, dins una demarcha de desvolopament durable per tal de sensibilizar lo grand public a de manièras alternativas de considerar lor avenidor, en adequacion amb lor cultura e las especificitats de lor territòri. Aquela reflexion animada per l’OPLO fa part integranta d’una estrategia de reconquista engatjada dempuèi mantunas annadas per far en sòrta que los abitants se reaproprian la lenga occitana, per que sa practica s’espandisca, tot parièr que sa transmission.
Aquel eveniment es estat labelisat pel ministèri de l’Ensenhament superior e de la Recerca.
– Gilbert Dalgalian, psycholinguiste retirat, autor dins la revista “Educacion e societats plurilingues”
– Jean-François Albert, co-director de Aprene, Establiment de ensenhament superior occitan
– Rachid Lhachmi, doctorant a l’universitat de Bordèu e al sen del laboratòri LACES
– Caroline Calvet, doctorante a l’universitat Paul-Valéry Montpellier 3 e al sen del laboratòri DIPRALANG
– Jean-Luc Lagrave, entrepreneire, www.adishatz.com
Discutanta :
– Kâlliane, collaboradora de la cadena Youtube de vulgarizacion Linguisticae
