Dins l'encastre de l'obertura de ParcourSup, l'Ofici public de la lenga occitana (OPLO) obrís una plataforma d'informacion per las liceanas e los liceans e prepausa diferentas iniciativas per promòure las formacions en lenga occitana dins l'ensenhament superior.
Far sos estudis en occitan
Sul site novèl « Occitan Estudis Mestièrs » (www.occitanetudesmetiers.com), los escolans de terminala pòdon retrobar l’ensemble de las formacions inicialas accessiblas post-Bac e en ligam amb l’occitan. Per cada formacion, un ligam dirècte cap a la plataforma ParcourSup es prepausat. Los escolans pòdon egalament contactar los responsables pedagogics o d’ancians estudiants diplomats.
Un acompanhament individualizat
Amb una multitud de causidas disponiblas e de dificultats per accedir a las informacions utilas, s’agis per l’OPLO de prepausar als escolans d’occitan de terminala un acompanhament per los orientar cap als interlocutors competents dins l’ensenhament superior. S’o desiran, los escolans poiràn egalament èsser meses en relacion amb d’associacions estudiantas suls campus de Bordèu, Montpelhièr, Pau e Tolosa.
Qualques espleches son egalament prepausats als ensenhaires d’occitan en licèu per promòure, a lor nivèl, los trajèctes d’estudis dins lo superior.
De besonhs de professional.a.s occitanofòn.a.s
Cada annada, de desenats de professionals son recrutats per lors competéncias en occitan. Los besonhs son sustot plan importants dins lo sector de l’ensenhament, amb lo desvolopament de las seccions bilinguas dins las acadèmias de Bordèu, Limòtges, Montpelhièr e Tolosa.
En França, de nombrosas universitats prepausan de cursus de lenga occitana. L’occitan es estudiat a Ais, Bordèu, Clarmont d’Auvèrnhe, Montpelhièr, Niça, París 4, París 8, Pau, Tolosa.
Aquel projècte es finançat per la Region Novèla Aquitània, per la Region Occitània e pel Ministèri de l'Educacion nacionala dins l'encastre del Plan d'accion licèu per la lenga occitana de l'OPLO.
