De faiçon estonanta, aquela fòto es una illustracion de l’idèa de desvolopament del projècte novèl d’establiment de l’Ofici (D’ÒC) : Desvelopar – Observar – Comunicar.
Per remembre, lo projècte d'establiment definís lo desvolopament de la faiçon seguenta:
« Desvolopar, es animar per cooperar, en contribuïssent a un dialòg recurrent amb los autres Oficis, en s’associant amb autres operators interregionals per estructurar de rets d’actors, en constituïssent una ret tecnica de Collectivitats, en s’apiejant suls ecosistèmas en plaça, en facilitant l’escambi entre professionals, en favorizant nòstres projèctes collectius. »
Aquí un exemple concrèt :
La Region Occitània organiza de jornadas de formacion intèrna de « cultura comuna » a l’entorn de la lenga occitana per sos agents. L’Ofici es estat convidat a participar.
Qué fa l’Ofici dins aquela formacion intèrna ?
- L’Ofici occitan s’es inspirat del trabalh ja realizat per l’Ofici Public de la Lenga Catalana
- A associat un operator interregional, Lo Congrès permanent de la lenga occitana, per realizar un quasèrn d’activitats en occitan-gascon e occitan-lengadocian.
- A escambiat amb los formators de la Region per enriquir la proposicion
- A assistit los formators dins la primièra jornada de formacion que s’es tengut ièr, dimars 20 de mai, a Tolosa e a la segonda a Sète lo 12 de junh, a Sète.
De faiçon estonanta, aquela fòto marrida dich fòrça del projècte desvolopat :
Mòstra un cercle d’agents-cantaires que, entre dos corses de lenga, entonan « Se canta » dins la cort de l’Ostal d’Occitania a Tolosa.
Mòstra sustot una cooperacion a l’ensag, un projècte collectiu en desvolopament, que poiriá, nos sembla, interessar dins lo futur d’autras collectivitats.
De seguir donc!
