Bilanç d’activitat 2019

L’Ofici public de la lenga occitana que que presenta lo son bilanç d'activitat 2019

A l’atencion deus operators linguistics, membres e partenaris institucionaus de l’Ofici public de la lenga occitana,

En aquera temporada propícia a la lectura, que pòrti a la vòsta coneishença lo bilanç de l’Ofici public de la lenga occitana de l’annada acabada. Se aquera iniciativa relèva d’un exercici reglementari entà ua estructura tau com la nosta, qu’avem desirat ne’n har un document qui – ac esperam – sia de bon léger dens un quéhar de transparéncia e de partatge sus las activitats d’aqueth utís qu’ei tanben lo vòste. Atau, l’equipa de l’Ofici que s’ei emplegada a apitar un bilanç 2019 a l’encòp estructurat, exaustiu e illustrat.

Qu’i trobaràtz las granas orientacions estrategicas de la politica publica e partenariau definida dab vosauts en 2018, la lor mesa en òbra concrèta, mes tanben los progrès o dificultats encontradas l’an passat dens aqueth exercici.

Qu’ac constataràtz, l’ensenhament qu’ei tostemps au còr deus pensaments nostes, dab la volontat de formar lo mei d’ensenhaires possible d’ua part, atau com contribuir a ahortir la “hami de lenga” deus eslhèves.

La prefiguracion de l’enquèsta sociolinguistica que marca egau ua etapa màger de l’an passat, e las resultas esperadas lèu que nos dèven perméter de melhorar la nosta intervencion e d’afinar la nosta estrategia territoriau. Enfin, 2019 qu’estó tanben lo parat d’esparpalhar lo noste plan de comunicacion, en tot perméter atau de har conéisher melhor los dispositius nostes d’ajuda de cap au monde.

Que s’ageish pas totun de se hornir un autò-satisfecit. Si un certe nombre d’accions realizadas qu’obreishen perspectivas estrambordantas, que sabem que nos demòra collectivament un long camin de perseguir. E lo nòste Ofici qu’a pas la pretencion, mes tanpauc los mejans de s’i escàder solet. La nosta politica linguistica que serà efectiva sonque s’arribam a tribalhar man dens la man enter partenaris associatius e institucionaus, de la Comuna dinc a l’Estat, e plan solide, dab vosauts.

Que vos desiri ua bona lectura e vos balhi rendètz-vos d’aciu quauques mes entà ua evaluacion plurianuau de la nosta accion.

 

Telecargar lo bilanç d’activitat 2019

Charline CLAVEAU

Presidenta de l’Ofici public de la lenga occitana

Ofici public de la lengua occitana

22, bd maréchal juin
31406 Tolosa cedex 9

Tel 05 82 60 02 80

Scroll to Top