Adopcion de la lei Molac : ua victòria istorica

Los parlamentaris que vienen d’adoptar definitivament la lei relativa a la proteccion patrimoniau de las lengas regionaus e a la lor promocion : qu’ei istoric, e qu’ei ua grana victòria per tots los qui parlan e viven ua lenga e ua cultura regionau, mes tanben per l’ensemble deus Francés dont lo patrimòni comun ei atau mei plan reconegut e protegit.

Simbolicament, qu’ei lo signe d’un basculament ideologic rasonable, enfin, de cap a la diversitat culturau : n’ei pas mei la paur de la division qui pren lo dessús, mes l’oportunitat de la soa riquessa e lo respècte deus drets culturaus de cadun.

Concretament, que’m hè gai qu’aquera lei e vienga securizar iniciativas qui portam dejà, tau com lo convencionament dab los rectorats entau desvolopament de l’ensenhament de l’occitan, o enqüèra lo desplegament de la senhaletica bilingua. 

Aquera lei qu’instaura tanben duas avançadas màgers : l’ensenhament immersiu hens lo public n’ei pas mei relegat a un estatut d’experimentacion tau com mentavut uei hens la nosta convencion ministeriau, aquera modalitat pedagogica qu’ei d’ara enlà beròi reconeguda per la lei.

Enfin, l’instauracion deu versament deus forfèits escolars au benefici de las escòlas associativas immersivas quan los escolans ne pòden pas beneficiar d’un ensenhament hens las lors comunas de residéncia qu’ei d’excellenta augura entà assolidar lo hialat de las calandretas.

Que viscan nostras lengas !.

Charline CLAVEAU

Presidenta de l’Ofici public de la lenga occitana

Ofici public de la lengua occitana

22, bd maréchal juin
31406 Tolosa cedex 9

Tel 05 31 61 80 50

contact@nullofici-occitan.eu

Scroll to Top