[ACADEMIA DE MONTPELHIÈR] Apèl a candidaturas pel dispositiu « ENSENHAR Professor »

Pel primièr còp, l’Ofici public de la lenga occitana e lo rectorat de l’acadèmia de Montpelhièr dobrisson un apèl a candidaturas dins l’encastre del dispositiu ENSENHAR Professor.

ENSENHAR Professor, qu’es aquò ?

ENSENHAR Professor es un es un dispositiu pilotat per l’Ofici public de la lenga occitana (OPLO), en collaboracion amb los servicis de l’Educacion nacionala de l’acadèmia de Tolosa, als nivèls rectoral e departamental.

Pretend acréisser lo nombre de professors de las escòlas qualificats per ensenhar en occitan dins las classas bilingas del 1r gra tant coma lo nombre de professors de collègis e licèus aptes a ensenhar lor disciplina en occitan (DNL).

A qual s’adreça aquel dispositiu ?

Totes los ensenhaires titulars son elegibles e cap de pre-aquesit en occitan es exigit.

Cossí se debana ?

Per l’annada escolara 2021-2022, primièra annada del dispositiu dins l’acadèmia de Montpelhièr, tres plaças de formacion son prepausadas.

La formacion compren 624 oras de corses despartidas sus 26 setmanas e mai d’estagis en classa e près d’un Centre de ressorgas pedagogicas en occitan (Cap’Òc – Canopé) durant 10 setmanas. Se desvolòpa sus una sola annada escolara.

Lo nivèl de competéncia en lenga ciblat es pel mens lo nivèl B2 del CECRL validat per la passacion del diplòma de competéncia en lenga (DCL).

La formacion desemboca sus la passacion d’una abilitacion academica a ensenhar en occitan.

Los luòcs de formacion seràn determinats en foncion de las demandas retengudas.

Mai d’informacions :  https://www.ofici-occitan.eu/oc/voletz-ensenhar-loccitan/dispositiu-ensenhar-professor/

Webinari d’informacion lo 21 d’abril de 2021 a 14:30

Per tal de respondre a vòstras questions, l’OPLO vos prepausa un webinari lo dimècres 21 d’abril de 2021 a 14:30. Per vos inscriure e pausar vòstras questions, rendètz-vos sus aquela pagina.

Depaus de las candidaturas dels ensenhaires :
entre lo 02 d’abril e lo 03 de mai de 2021.

Aquela dubertura es la 3a etapa dins lo desplegament del dispositiu “ENSENHAR Professor” sus l’ensemble del territòri de l’Ofici public de la lenga occitana.

Ofici public de la lengua occitana

22, bd maréchal juin
31406 Tolosa cedex 9

Tel 05 31 61 80 50

contact@nullofici-occitan.eu

Scroll to Top