Après una annada escolara 2024-25 de transicion e de prefiguracion del projècte novèl, lo Cap’òc, servici de la Ret CANOPÉ, dispausa ara d’una equipa plenament operacionala.
Lo Cap’òc es un servici de la Ret Canopé en carga de la produccion de material pedagogic en ligam amb los besonhs dels ensenhaires d'occitan e en occitan, del primari coma de segondari.
A tanben per mission d’acompanhar los ensenhaires d’occitan e en occitan (professors bilingües o de DNL dins lo segondari) que desiran un sosten o conselhs d’òrdre pedagogic.
Aquela estructura es sostenguda financièrament per la Ret Canopé, l’Educacion nacionala, las regions Novèla Aquitània e Occitània (per l’OPLO) e los departaments de Dordonha e de Pirenèus Atlantics.
Las missions
Las missions del Cap’Òc son rajustadas a l’entorn de l’edicion e la mesa a disposicion de ressorsas pedagogicas en occitan:
- La traduccion de manuals e de tot autre obratge destinat a l’ensenhament de la lenga e dins la lenga pel 1èr gra o lo segondari e lor difusion en version numerica o papièr ;
- La creacion o la traduccion d’obratges de literatura joventut e de tot autre supòrt d’ensenhament e lor difusion en version numerica o papièr ;
- La difusion d’aqueles obratges en version papièr e/o numeric, en collaboracion amb lo Cirdoc-Institut occitan de cultura e l’Ofici public de la lenga occitana;
- La mesa a disposicion de ressorsas pedagogicas e l’acompanhament dels ensenhaires a la mediatèca basada a Pau, permetent l’acuèlh de collègas ensenhants e la mesa a disposicion de ressorsas pedagogicas sus l’occitan ;
- La mesa a disposicion de las ressorsas pedagogicas editadas pel CAP’ÒC aital coma lor acompanhament pedagogic pel sit novèl internet (www.capoc.fr)
- L’acompanhament dels ensenhaires desirant utilizar aquelas ressorsas dins lor classa e lor didactisation. L’equipa es a la disposicion dels ensenhaires pendent lor visita a la mediatèca de Pau o a Canopé Montpelhièr, e pòt participar a diferents estagis de formacion a la demanda dels formators.
Aquelas produccions son realizadas en occitan gascon, lengadocian e lemosin que son presents dins las acadèmias de Bordèu, Limòtges, Montpelhièr, Peitieus e Tolosa. Son destinadas a l’ensenhament immersiu, bilingüe, afortit (1èr gra) e opcional (2nd gra) presents dins aquelas acadèmias.
Lo foncionament
La concepcion del programa editorial annal del Cap’Òc s’apièja sus tres comitats, fisadors de sa pertinéncia respècte a las espèras del terren. L’Educacion nacionala (los IA-IPR d’occitan) e la direccion territoriala de Ret Canopé participan activament al seguit de cada comitat.
- Lo comitat de pilotatge (octobre): amassa los partenaris financièrs (departaments 64 e 24, Regions Novèla Aquitània e Occitània, l’OPLO). Aquel comitat definís las orientacions grandas aital coma los marges budgetaris permetent de projectar un programa pluriannal de produccions
- Lo comitat editorial (novembre): amassa los CPDs occitan, de las ensenhants-ressorsas identificats e las IA-IPR d’occitan. Dins aquela instància son remontats los besonhs de terren.
- Lo comitat tecnic e pedagogic (genièr): amassèt los caps de servici e cargats de mission de las collectivitats e de l’OPLO. Aquel comitat estúdia e valida la factibilitat tecnica e financièra dels projèctes retenguts pel comitat editorial
Sortidas venentas
Validat pendent lo precedent programa editorial de 2025, un album joventut es estat traduch pels cicles 2 e 3 : « Al Reialme de las abelhas » paregut a las edicions Rebombeta ven de sortir. Coma totas las produccions del servici, passadas e a venir, es declinat dins las tres variantas presentas dins son perimètre d’accion: gascon, lengadocian e lemosin. Serà difusat al mes de decembre al près de totes los establiments dispausant d’un ensenhament bilingüe immersiu o afortit de l’occitan per aqueles dos cicles. Coma per totes los espleches meses a disposicion dels ensenhaires pel Cap’òc, un ensemble de proposicions d’espleitacions pedagogicas serà mes en linha sul sit www.capoc.fr.
Seguirà al tot debuta de l’annada 2026 una creacion a l’entorn de comptinas pel cicle 1. S’agiguèt d’un cofret de 35 afichas A3 rècto-revèrs illustrant caduna una comptina en occitan. Es egalament concebut en ligam amb un acompanhament pedagogic.
Un ensemble de fichas de cultura e civilizacion occitanas tractant de personalitats occitanas celèbras e de las vilas grandas d’Occitània serà mes en linha sul sit del Cap’Òc al meteis periòde. Aquel esplech es concebut per respondre puslèu als besonhs de l’ensenhament segondari e serà completat cada annada per un tòm novèl.
Sortirà enfin dins los primièrs meses de 2026 una traduccion de l’esplech d’ensenhament de las sciéncias « Sciéncias a viure » pel cicle 2, una traduccion de l’obratge de las edicions Accèsses. Lo cofret d’activitats arribarà a totes los establiments assegurant un ensenhament bilingüe de l’occitan en cicle 2. Los complements numerics e lo guida del mèstre seràn disponibles per ligam de telecargament que serà enviat a aqueles meteisses establiments.
Per accedir als obratges anteriorament produches (dins lo limit dels estòcs disponibles), podètz contactar:
- Lo Cap’Òc pels obratges en gascon : contact.capoc@reseau-canope.fr
- L’Ofici public de la lenga occitana pels obratges en lengadocian e en lemosin: contact@ofici-occitan.eu
D’un autre costat, lo sit internet del Cap’Òc www.capoc.fr es estat tornat fondar per una accessibilitat melhora. Lo catalòg detalha totas las produccions e balha accèsses per caduna d’ela a de pistas e dels exemples detalhats d’espleitacions pedagogicas.
En mai, a Pau, la mediatèca aculhís los ensenhaires e tot autre public :
- lo dimècres 9h-17h30
- lo dijòus 11h-17h
- lo divendres 9h-16h45 (per fin que los estudiants M1 M² MEEF occitan pòscan accedir a las ressorsas sus lor temps de preséncia a l’INSPE)
- E mai la primièra setmana de cada periòde de vacanças, fòra Nadal.
Una equipa inter-academica à vòstre servici
L’equipa es basada sus dos sits de Réseau CANOPE :
- a Pau, 44 Baloard del Rector Jean-Sarrailh.
- a Montpelhièr, Talhièr Canopé 34, 360 Carrièra Michel-de-lo Hospital.
Aculhís en sos locals tot ensenhaire desirant un acompanhament.
L’equipa es compausada de tres ensenhaires meses a disposicion per l’Educacion nacionala (2 del rectorat de l’acadèmia de Bordèu e 1 ensenhaira de l’acadèmia de Montpelhièr) aital coma d’una cap de projècte transmédia remunerada per Ret Canopé.
Patrick Guilhemjoan – Coordinator e referent gascon pel segond gra – Sit de Pau
Professor agregat d’occitan, ensenha dempuèi quasi trenta ans e a una experiéncia de l’ensenhament dins lo primari, lo segondari e lo superior. A egalament ensenhat l’anglés dins l’encastre de sa bivaléncia.
A publicat de diccionaris, una gramatica e dels metòdes d’ensenhament de la lenga. Es enfin doctor en lenga e literatura occitanas.
Estèle Lama – référente lengadocian e lemosin pel segond gra – Sit de Montpelhièr
Professora agregada d’occitan, a una experiéncia de trenta ans d’ensenhament de l’occitan e del francés dins lo segond gra dins d’establiments publics de l’Educacion Nacionala e del ministèri de l’Agricultura d’Erau. A publicat d’obratges pedagogics a destinacion del primièr e del segond gra. Contunha d’ensenhar l’occitan dins la ret associativa.
Dins lo Cap’òc trabalha essencialament suls contenguts pedagogics.
Christine Nougué-Debat – Cap de projècte transmédia – Sit de Pau
Après 8 ans d’experiéncia a l’Institut Occitan (Vilhèra – 64) coma cargada de desvolopament, a integrat l’equipa del Cap’ÒC en 2008 coma infographiste ; es cap de projèctes transmédias dempuèi 2017 e s’ocupa principalament de la partida edicion, de la redaccion dels contractes a la transmission dels fichièrs a l’estampaire en passant per la recèrca d’estima, la mesa en pagina, etc. Participa sovent a la concepcion e es egalament en carga de sit internet.
Titular d’una mestresa de geografia, d’una licéncia d’administracion publica e d’una licéncia d’istòria de l’art, e fòrta de 17 ans d’experiéncia al Cap’ÒC, es un pauc la generalista de l’equipa.
Benjamin Salinas – referent gascon primièr gra – Sit de Pau
Es professor de las escòlas dempuèi 2000 (Asasp puèi Issòr) e a ensenhat en classa bilingua a l’escòla de La Seuva de 2006 a 2025.
Es estat recebut al CAPES de fisica-quimia en 2017. Es estat formator al Cfp’òc de 2023 a 2025.
Tota l’equipa del Cap’Òc es a vòstra disposicion per reculhir vòstras suggestions e remarcas.
