Correspondéncia #1 – EDITO

Adishatz a tots,

Qu’avetz enter las mans la purmèra letra d’informacion de l’Ofici public de la lenga occitana. Aquesta publicacion, a paréisher tots tres mes, qu’a per mira de har conéisher mei plan los obradors d’intervencion – las escadudas mes tanben los empachs encontrats -, atau com las causidas estrategicas deus sons membres.

Be cau díser que la pagèra de la tasca e deu son territòri d’accion, au par deus mejans umans o financèrs, que renden plan malaisida la lisibilitat de las intervencions de l’Ofici entau monde, a bèths còps. Enfin, que devem aus administrats ua transparéncia totau qui passa solide per ua comunicacion mei activa que çò qui n’èra dinc adara, quan l’ensemble d’aqueras decisions (en Assemblada generau e en Conselh d’administracion) e seré publicat despuish mei d’un an suu site internet. 

Cada letra que s’estacarà a har vàler ua tematica – estat deus lòcs e analisi, dispositius de l’Ofici, accions d’operator – ua letra politica de l’un deus sons membres, punts d’actualitat e enfin un calendari deus eveniments a viéner.

Aquesta letra qu’a lo nom de « correspondéncia». Çò qui significa que’s vòu tanben un dialògue : qu’èm ubèrts a suggestions de totas tà çò deus subjèctes a tractar.

Non seratz pas susprés de constatar qu’aquesta purmèra letra ei dedicada a l’ensenhament. Vertat l’Ofici qu’a hèit de la transmission per l’escòla lo son obrador prioritari de la soa creacion enlà, mes l’actualitat qu’implica malaja qu’i jògue mei que jamei lo son ròtle d’ajuda a l’avaloracion. Atau, peu purmèr còp, qu’èm en capacitat de vos presentar un bilanç de rentrada, qui permet mei que mei ua purmèra avaloracion deus efèits de la refòrma deu licèu.

En aqueths darrèrs dias de genèr, que hèi part a cadun deus mens vòts mei bons, e entad aquesta annada electorau, que desiri que lo noste interès comun – la sauvaguarda e la promocion de la lenga occitana – e posca trobar plaça dens lo debat public. Per’mor las comunas, quina que’n sia la color politica, que pòden har un ròtle màger dens aqueth domeni, e shens que per’mor qu’an las escòlas com competéncia, mes tanben per’mor que pòden melhorar la preséncia de la lenga dens l’environament de tot dia.

Vos desiri ua bona annada

Charline Claveau-Abbadie

Presidenta de l’Ofici public de la lenga occitana

Conselhèra regionau Navèra-Aquitània, delegada a las lengas e culturas regionaus

Scroll to Top