Grop de recèrca-accion suls fondamentals (GRAF)

Un utís al servici del renfortiment dels cursus bilingües

La convencion-quadre qu’a per tòca d’espandir e estructurar l’ensenhament de l’occitan de la mairala al licèu (signada entre l’OPLO e lo ministèri de l’Educacion nacionala [apondre lo ligam]) se dona per prioritat de renforçar los cursus bilingües de la mairala al licèu. Aquela prioritat, que se retròba tanben dins las declinasons academicas signadas amb los rectorats de Bordèu, Limòtges, Montpelhièr e Tolosa, implica diferentas dimensions : la formacion dels ensenhaires/-as, lo recrutament dels escolans, la dubertura de classas, la continuitat dels cursus, la reconeissença dels aquesits, etc. Mas concernís tanben la question de la didactica pròpria a l’ensenhament bilingüe francés/occitan. Es dins aquel contèxt qu’es estat imaginat per l’OPLO lo Grop recerca-accion de didactica bilingüa francés-occitan suls ensenhaments fondamentals a l’escòla primària (GRAF)

Sosténer las equipas ensenhantas e formatoras

En rason de sas competéncias interacademicas, l’OPLO a causit d’investir lo terrenh de la formacion pedagogica per tal d’aportar un sosten suplementari a las equipas ensenhairas e formatoras dins lor reflexion e lor practica de l’ensenhament bilingüe.

La constitucion del Grop de recèrca-accion sus la didactica bilingüa francés/occitan pretend crear un dialòg entre diferents actors del mond educatiu, que sián cercaires/-as, formator.a.s de terrenh, especialistas de la question o quadres de l’Educacion nacionala. L’objectiu d’aquelas discussions es d’adaptar a tèrme los biais professionals en classa.

A mejan tèrme, los autres objectius son de bastir de percorses dedicats de formacion en linha e d’organizar en dirècte de sessions de formacion de formator.a.s e d’ensenhanaires/-as.

Un quadre de reflexion interacademic

Lo comitat de pilotatge es articulat entre l’OPLO, portaire de la proposicion, e l’IEN encargat de mission ensenhament bilingüe de l’acadèmia de Tolosa en estreita relacion amb los IPR de la disciplina e los IEN encargats de mission academics de las autras acadèmias (Bordèu, Limòtges e Montpelhièr). Los membres d’aquel comitat seràn convidats a las reünions del grop.

Per cada annada escolara, una tematica de trabalh es identificada. Per l’annada escolara 2021/2022, los trabalhs s’articularàn a l’entorn de la tematica « Dimension lingüistica de matematicas ». 

Esquèma explicatiu (en francés)

Office public de la langue occitane

22 boulevard du Maréchal Juin
31406 Toulouse cedex 9

05 31 61 80 50

contact@nullofici-occitan.eu

Scroll to Top